愛羣義工團押解及支援組分隊同東頭懲教所分隊喺7月11日走訪「仁濟醫院梨木樹彩悠軒」殘疾人士院舍，喺該院舍嘅活動室進行牆紙拆除服務。該殘疾人士院舍因應其翻新需要，計劃進行牆紙更換工程，以改善院舍環境，故主動邀請義工團協助，義工團當然不負所托，全力配合。 當日義工們齊心協力，先將舊牆紙一幅幅拆下，再用工具細心剷除牆上殘留嘅牆紙物料，每個步驟都講求耐性同細心。完成拆除後，大家亦一同清理現場，確保場地整齊整潔。 整個過程義工們分工合作、認真投入，順利完成活動室嘅牆紙拆除工作，為院舍日後更換牆紙做好準備，進一步提升院舍環境。 透過今次服務，義工們希望以實際行動關心社區中嘅弱勢社群，將關愛同正能量傳遞開去。

愛羣義工團喜靈洲分隊嘅義工喺7月3日同7月10日放工後，走訪離島坪洲探訪當區老友記，為佢哋送上愛心同關懷。 義工們除咗為老友記送上物資，更走入佢哋屋企，同佢哋傾下計、陪下佢哋。探訪期間，有老友記話見到義工嚟探佢好開心，一句簡單說話，已經令義工想多留一陣，陪佢傾多幾句，聽下佢講以前嘅故事。原來義工短暫嘅出現，對老友記嚟講，可能已經帶來一整日嘅溫暖。 透過今次活動，義工更加了解到老友記最需要嘅係一份陪伴同關懷。由於離島交通比較唔方便，老友記外出都較為困難，但只要我哋願意多行一步多探訪佢哋，社會就會多一分溫暖。希望之後有更多同事一齊參與義工服務，將關愛帶到社區每一個角落。

愛羣義工團羅湖懲教所分隊、懲教署體育會技擊會跆拳道分隊，聯同懲教署職員會所轄下九龍第1555旅小童軍A團領袖嘅義工，喺7月5日齊集喺香港理工大學邵逸夫體育館，參與由社企苗慈善會主辦嘅「深港同心向未來2026第五屆社企苗大灣區青少年武藝大賽暨結業典禮」嘅義工服務！ 義工們當日負責場地佈置、維持秩序、安排選手進退場、登記處同召集處等工作。呢個盛會不僅成功推廣跆拳道運動，更為粵港澳大灣區搭建寶貴嘅青少年交流平台，讓三地青少年喺切磋武藝嘅同時，開拓視野、強健體魄。當義工們見到參賽嘅青少年喺競技場上自信綻放、茁壯成長，無不感到欣喜與鼓舞。

【 #為善最樂 | 愛羣義工溫情探訪．跨世代同賀回歸 】 #懲教署愛羣義工團 再次出動！今次 #香港懲教學院分隊 同 #押解及支援組分隊，參與咗由 #香港仔坊會 舉辦嘅「慶回歸29周年『90後』關愛『八十後』社區『友里』探訪大行動」，走訪田灣漁映樓、石排灣邨及漁光村，探訪咗多戶80歲或以上嘅老友記，共慶回歸之餘，亦為佢哋送上真摯嘅關懷同祝福 。 探訪期間，義工除咗向長者送上 #慶回歸福袋 外，更加準備咗蛋糕同旗仔，同老友記一齊慶祝回歸兼高壽之喜，為現場增添滿滿嘅喜慶氣氛。 今次義工服務展現咗跨世代關懷共融精神，義工透過窩心探訪同互動，唔單止溫暖咗老友記嘅內心，亦為社區注入咗正能量，更令慶祝 #回歸紀念日 增添多一重意義！ 香港懲教署 Facebook 官方專頁連結：https://www.facebook.com/share/p/1KNUyMJZYm/

愛羣義工團石壁監獄分隊聯同沙咀懲教所分隊喺6月15、16同23日到訪寶蓮禪寺，協助籌備「香港荷花展2026」。義工們齊心協力投入各項籌備工作，包括場地設置、搬運花盤同相關物資等，展現出團結合作同不辭勞苦嘅精神。服務期間更遇上天雨，不過義工們無懼風雨，全力以赴完成各項任務。主辦機構亦喺荷花展典禮向義工頒發感謝狀，表揚佢地喺籌備工作中嘅熱心參與同貢獻。 義工們盡心盡力準備荷花展，以實際行動服務社區，並期望市民除咗可以欣賞荷花之美同感受中國傳統文化外，亦能體會到活動背後凝聚嘅一份心意。

【 #為善最樂 | 端午愛心速遞．「糭」有你心意 】 #端午節 除咗有 #懲教署龍舟隊 嘅健兒喺水上落力划槳，展示剛勁活力嘅一面之外，懲教人員亦有溫暖柔情嘅一面，熱心向社區有需要嘅人播暖傳愛！#懲教署愛羣義工團 早前兵分多路，去到多區展開端午關愛大行動，為長者同基層家庭送上滿滿嘅節日心意同關懷！ 愛羣義工團 #人力資源處、#香港懲教學院分隊、#荔枝角收押所分隊 同 #壁屋懲教所分隊 率先打頭陣，去到黃大仙區參與由楊震彩虹長者中心主辦嘅「端陽暖萬心2026」活動，親手將愛心福袋送到長者手上。 另一邊廂，各分隊連日嚟繼續密密送關愛：#白沙灣懲教所分隊、#東頭懲教所分隊、#大潭峽懲教所分隊 同 #香港懲教學院分隊 聯同東區筲箕灣關愛隊展開「濃情端午．一心一『糭』」探訪；#壁屋監獄分隊 就去到慈雲山參與嗇色園可聚耆英地區中心「端陽暖萬心2026」活動，探訪老友記兼送上端午糭；#勵敬懲教所分隊 亦參與九龍樂善堂嘅「樂善之友．樂善端午糉有情」，貼心探訪獨居、雙老長者同基層人士；#大欖懲教所分隊 更特別去到浸信會區樹洪伉儷康復護老院，現場大展身手包糭兼派糭，陪長者提早過節！ 福袋送到手，溫馨陪伴笑呵呵！只要有心，關懷「糭」會喺身邊，希望愛羣義工團嘅心意都可以感染大家，一齊為社區增添關愛同人情味，小編再次祝大家 #端午節快樂！ 香港懲教署 Facebook 官方專頁連結：https://www.facebook.com/share/p/1C8XhoobWz/

【 #更生同行 | 愛與共融繪出色彩香港．平凡隧道變身藝術畫廊 】 大家有冇留意到，尖沙咀北京道附近嘅行人隧道，近日已經變成一個全新嘅打卡地標？ 一班參與「沿途有『理』」延展計劃嘅 #受監管青年 及 #更生青年，日前聯同 #共創明Teen 學員，同埋一眾熱心嘅社會人士，喺著名 #藝術家馬興文 帶領下，一齊為呢條行人隧道繪畫主題為「色彩香港」嘅壁畫，用畫筆為城市注入關愛、共融同正能量。#受監管青年 同 #更生青年 更藉住每一筆每一畫，向社會表達重建生活、回饋社區嘅決心。 其中一位受監管青年阿明（化名）表示：「好開心可以有機會親手為香港出一分力，將原本一條平凡嘅行人隧道變成充滿藝術氣息嘅空間，為香港添上色彩。呢次經歷令我更加珍惜每一個回饋社會嘅機會。」另一位更生青年阿瑩（化名）則指：「喺更生路上，我好感恩遇到好多有心人幫過我，令我嘅人生重拾色彩。即使而家我嘅監管令已經完成咗，但一知道有呢個活動，我就即刻報名。我希望通過呢次集體創作，能為社區、為走過呢條隧道嘅人，帶嚟正能量同埋屬於香港嗰份人情味。」 呢次活動係 #小龍馬慈善基金 舉辦嘅大型藝術盛事其中一個重點項目。#懲教署愛羣義工團 亦派出職員義工參與協助學生一齊完成創作，懲教署署長黃Sir更親身到場支持，希望咁有意義嘅公共藝術創作，能夠喚起市民對城市嘅歸屬感。 經過大家同心協力，原本平凡嘅隧道「華麗轉身」，變成富有香港特色嘅藝術畫廊！大家經過呢條隧道嘅時候，記得停低腳步打個卡，感受下呢份充滿熱誠同創意嘅成果呀！ 香港懲教署 Facebook 官方專頁連結：https://www.facebook.com/share/p/16zXckLR4S/

【 #為善最樂 | 用專業守護社區．帶領學護傳關愛 】 大家尋日有睇過《 #紀錄有妳 》關於 Stephanie 嘅故事，就會體會到圍牆內「白衣天使」嘅日常工作一啲都唔簡單！不過幾忙都好，呢班擁有專業護士及醫療資格嘅懲教人員，愛心並唔局限喺圍牆之內，佢哋更會把握公餘時間，善用專業技能，關愛社區上有需要嘅人！ 早前 #懲教署愛羣義工團#健康護理組分隊 就聯同 #仁安醫院護士訓練學校 嘅學護義工，一齊去到 #田灣漁映樓 上門探訪長者。除咗幫長者量血壓，了解佢哋嘅基本健康狀況及講解安全用藥小貼士之外，一眾義工仲變身成為老友記嘅「暖心知音」，細聽下佢哋嘅心底話，並送上窩心嘅關懷。 老友記嘅笑容，係愛羣義工團 keep 住內心團火、不斷前行嘅強大動力。呢份助人熱誠將會薪火相傳，引領更多醫護專業及唔同界別嘅義工一齊走入社區，將關愛同溫暖一直延續落去！ 香港懲教署 Facebook 官方專頁連結：https://www.facebook.com/share/p/1BFZ31zY5A/

【 #為善最樂 | 人寵互動療癒心靈．為街坊打打氣 】 除咗 #懲教署愛羣義工團#警衛犬隊分隊 對動物有愛心，其他分隊都一樣愛心爆棚！ 早前 #羅湖懲教所分隊、#東頭懲教所分隊 同 #押解及支援組分隊 出動去到大埔區為「寵愛社區．從心微笑」活動擔任義工！活動吸引約500人次參與，以 #心理健康 及 #人寵互動療癒 為核心，希望幫助近期受情緒困擾嘅大埔區居民，透過專業講座及與動物親密接觸，紓緩壓力，為街坊打打氣之餘，亦為社區注入正能量！ 香港懲教署 Facebook 官方專頁連結：https://www.facebook.com/share/p/1E4wh1mRdD/

愛羣義工團小欖精神病治療中心分隊於4月12日，喺助理署長(更生事務​)唐Sir嘅帶領下，走訪梁顯利油麻地社區中心，參與由香港兒童基金會主辦嘅「玩出好心晴-校園計劃啟動禮」。 ​活動由具備精神科護理背景嘅義工，透過喺台上分享，向現場超過100 位嘉賓、校長、老師、家長同學生一齊探討如何處理壓力同建立正向校園生活。除左上述分享講座，義工更協助籌備攤位遊戲，透過親子桌上遊戲及互動遊戲，推廣正向精神健康嘅重要性。 義工們不僅傳遞精神健康訊息，更發揮專業所長回饋社會。我們將繼續關注青少年嘅精神健康，為社區發展出一分力！