「精神健康與預防毒品」「國家安全」專題講座

愛羣義工團小欖精神病治療中心分隊同大欖女懲教所分隊再次聯手出動！佢哋喺9月15日到訪屯門仁濟醫院何式南小學，為超過200名小學生帶來既有趣又充實嘅專題講座，內容包括「精神健康與預防毒品」同「國家安全」。

小欖精神病治療中心分隊嘅精神科護士義工以生動易明嘅方式，與同學們分享有關精神健康嘅小貼士，以及提醒佢哋毒品嘅禍害，令佢哋學識保護自己、遠離毒品 ，並建立正確價值觀。

而大欖女懲教所分隊嘅義工則向同學們介紹國家安全概念，鼓勵同學們從小培養守法意識，明白自己應有嘅責任同角色 。

義工喺活動期間安排咗互動遊戲同分享環節，現場氣氛非常熱烈！同學們不但學到實用嘅精神健康同毒品預防知識，亦加深對國家安全嘅認識，並度過了一個收穫滿滿嘅下午。愛羣義工團將會繼續發揮專業所長，走進校園同社區，一同守護下一代健康成長。