走訪離島坪洲探訪老友記

愛羣義工團喜靈洲分隊嘅義工喺7月3日同7月10日放工後，走訪離島坪洲探訪當區老友記，為佢哋送上愛心同關懷。

義工們除咗為老友記送上物資，更走入佢哋屋企，同佢哋傾下計、陪下佢哋。探訪期間，有老友記話見到義工嚟探佢好開心，一句簡單說話，已經令義工想多留一陣，陪佢傾多幾句，聽下佢講以前嘅故事。原來義工短暫嘅出現，對老友記嚟講，可能已經帶來一整日嘅溫暖。

透過今次活動，義工更加了解到老友記最需要嘅係一份陪伴同關懷。由於離島交通比較唔方便，老友記外出都較為困難，但只要我哋願意多行一步多探訪佢哋，社會就會多一分溫暖。希望之後有更多同事一齊參與義工服務，將關愛帶到社區每一個角落。